دردشة خاصة بالحوااااااااامل

يا أم فطوم المشي بداية التاسع ممتاز عن تجربة لكن لاتجهدين نفسك يعني كل يوم امشي شوي وزيدي الوقت بالتدريج
اشوفكم على خير كروشات تصبحون على خير

هلا غناتي نورانية
ماتشوفي شر الله يعطيش الصحة والعافية
ان شاء الله بحق صاحب هالمصيبة الله يفكش من هالسكر ويسهل حملش وولادتش
مشكورة غناتي نفعتيني واجد بهالمعلومات

أم فاطمة بالنسبة للمشي زي ماقلت ليكم من قبل
الدكتور قال لا تمشي الا اذا قلت لش وبعدين قال في الاسبوع 38 مايبغى امشي من اللحين مادري لاويه

لا تنسوا بكرة صلاة آخر أربعاء من صفر
الله يدفع عنا جميع البلا

شحالكم؟
مو كأنكم اختفيتوا؟
الله يعينكم
طمنوني عليكم بس
ام فاطمة انتين بعد دخلتي التاسع حركات
عقبالي :D

بسألكم
الكحول اللي نستخدمه بعدين للسرة نفس الكحول العادي؟
لأن كأني قريت ان في كحول خاص لسرة البيبي في المستشفى

وبالنسبة لشنطة المستشفى ماحطيت فيها شي وامتلت وشكلي باخذ ويايي شنطتين غير شنطة البيبي مع انها مو صغيرة
حطيت ليي بيجامة حق طلعتي ودشداشة حق قعدتي
وفرشاة شعر وصابون وليفة وشبشب
ورب حمام وستيانة رضاعة
يعني باقي عليي أشياء واجد بعد وخلاص مافيها مجال!!!

نسيت ماقلت ليكم طلعو نتايجي أمس والحمد لله نجحت فيهم كلهم وكان عندي مادة خايفة منها بس الحمد لله عديتها ..

أم فاطمة مبرووووووووووووووووووووووووووك مليار مبروك على النجاح ان شاء الله دوووووووووم يارب ربي يوفقك دايما اشوفكم بكرة ان شاء الله

أبشركم
يوم الجمعة 1 ربيع الأول رزقني الله بنور دنيتي وأغلى هدية في حياتي

سيد سجاد

وللهِ الحمد والمنة
الحمدلله ربي العالمين .. الله سهل ولادتي وولدت طبيعي
والله مو ناسيتنكم من ولادتي واني ادعي ليكم الله يسهل عليكم زي ماسهلها عليي
بس أسألكم الدعاء ولدي لسى في الحضانة لأني جبته 35 اسبوع
بس الحمدلله صحته بخير ووزنه اول ماجبته كيلوين و200 جرام

وعليكم بالأعمال اللي كتبتوها فوق كل يوم داوموا عليها لا تخلوها
الحمدلله ببركات أهل البيت وبركات دعواتكم شفت نور عيوني بس إن شاء الله مايطول في الحضانة وارتاح انام وهو جنبي

شحالكم كروشات؟
بما إني جالسة وحدي وخواتي طالعين يكملوا أغراض البيبي
وولدي مو عندي وامي ويا النسوان والنت فاضي
باقول ليكم قصة ولادتي بنور عيوني سيد سجاد

يوم الجمعة واني نايمة نزل عليي الماي الساعة 7 الصباح
قمت غسلت وظل ينزل كل شوي ماوقف
وقعد زوجي مختلع قال امشي المستشفى
والحمدلله جت سهالة كان طريق الهاي وي مسكر صار ليه 6 او 7 شهور ويوم الخميس قبل ولادتي بيوم فتحوه
وكان يوم جمعة والاشارات فاتحة والطريق فاضي وكان بداية الصباح وبداية السهالات
رحت بروكير قاسوا ضغطي تحت كان مرتفع شوي وركبوني
شيكت الدكتورة المناوبة يمنى على الماي وطلع ماي الجنين والرحم مفتوح 4 سم
قالت ليي الولد بيحتاج حضانة باشوف كان ياخذوه وهني الصدمة
راحت شيكت على الملف الا شافت ان احنا مو تأمين على حسابنا
قالت لينا ترى الحضانة في اليوم بـ 30 ألف ريال !!!
اني فكرتكم تأمين فقرروا اذا اني ابغى اولد في المستشفى ولا اروح مستشفى ثاني
وقالت روحوا مستشفى الدمام
قلت بولد في مستشفى ثاني ويشو 30 ألف !!!
وقالت يمكن يحتاج اسبوع يمكن 10 ايام يمكن اقل ويمكن أكثر
تخيلوا يعني لو 10 أيام كان بيطلع بـ 300 ألف
المهم قلنا ليها مابولد في المستشفى
وزوجي خايف لأن تبغانا نقرر بسرعة لأني في حالة ولادة وزوجي مايدل مستشفى الدمام
قالت الممرضة مستشفى الملك فهد قريب وأكيد فيه حضانة
وقالت الدكتورة انه في وجه مستشفى سعد
وقلنا خلاص
بس قالت الدكتورة قبل لا أطلع بيسووا تخطيط لنبض الجنين نص ساعة
والحمدلله طلع النبض كويس وعطوني ورقة تقرير ورحنا مستشفى الملك فهد التعليمي

دخلت على الطورائ وقالت الدكتورة (مادري هي دكتورة ولا تطبق ولا ويش كانت قطيفية) قالت بتشوف اول الحضانة
اني سمعتها تقول مافيه وقالت بتشيك عليي لأن حتى لو قريب بولد ومافيه حضانة بيولدوني
اللحين اني استنى في الغرفة قالت ليي الممرضة افصخي قلت ليها مافيه سرير في الحضانة
قالت لا ماعليش فيه واحد حق الطورائ
وجابت ليي الممرضة كيس أزرق وقالت افصخي كل شي وحطيهم فيه وفلتت عليي ثوب المستشفى وخلوني بروحي واني كان بادي فيي الطلق طبعاً من طلعتي من البيت بس كان ألم يحتمل شوي
وخلصت وجت شيكت عليي الدكتورة قالت الرحم فتح 5 الظاهر او 6
هذا الكلام كان الساعة 9 ونص تقريباً
وركبوني غرفة الولادة وحطت عليي الممرضة حق تخطيط قياس نبض الجنين والطلق
ومادري الساعة كم حسيت اني بولد وقلت للمرضة وجت الدكتورة نفسها اللي شيكت عليي تحت
لا واني قاعدة على السرير واسمع وحدة تصرخ والدكاترة يحمسوها يالله يالله وممتاز ومادري ويش ولاني راضية اسمع صوت صريخ واني اقول ياعلي للحين ماولدت وخايفة اني اطول
والممرضة فلبينية وطول مهي قاعدة تقول ليي انتين 35 اسبوع الجنين صغير مابتطولي وكانت تهونها عليي
وتقول ليي قولي ورايي لا اله الا الله محمد رسول يارب واني اقول وراها واتوسل بأهل البيت
الين جى وقت الولادة وجت الدكتورة
وطبعاً كل هالكلام وزوجي تحت مايدري عني عطوه بس كيس أغراضي وركبوني حتى ماقلت ليه خلاص بولد لو شي

المهم وهي تقول ليي ادفعي كأن وياش امساك واني ادفع
وزي الا تزمخ عليي وياكل دفعة تقول ليي يماما ادفعي بقوة مرة وحدة ومادري ويش ماعجبني اسلوبها بتاتاً البتة
وبعدين جابت ليي الممرضة المقص توريني وياه عشان الظاهر أخاف وادفع مرة وحدة
قمة العباطة

المهم وطلع نور عيوني وفرحتي الساعة 11:35 حزة أذان الظهر تقريباً
الحمدلله رب العالمين
وحطوه شوية بس ثانيتين ثلاث في حضني وأخذوه
واني أسمع صريخه وأصيح ماني مصدقة وماني قادرة ادور عشان أشوفه
وبعدين جى وقت الخياطة وحطت ليي مسكن وبدأت في الخياطة
وسألتني تحسي بالخيط قلت ليها ايه وزادت ليي البنج
وخلوني الى الساعة 2 الا وبعدين ودوني الغرفة والساعة 2 كان وقت الزيارة وجى زوجي وأهلي
وطبعاً مااتصلوا لزوجي قالوا ليه اني ولدت وهو صار ليه ساعة يتصل ولا احد يرد

وولدي ودوه الحضانة وحطوا عليه جهاز تنفس بس أول يوم ولله الحمد
ومن ثاني يوم شالوا عنه الجهاز وكان بصحة وسلامة
واني طلعت ثاني يوم كان الوضع في المستشفى مو مريح خبركم مستشفى حكومي ومعاملة الممرضات مو ذاك الزود
وولدي للحين في الحضانة بصحة وسلامة لأن اللحين قاعدين يعطوه حليب وكل يوم يزيدوا الجرعة وبيشوفوا ويش يصير وياه
اليوم روحتي ليه يقولوا سألت الممرضات متى أقدر آخذه قالوا يمكن السبت أو الأحد
وللحين مارضع مني اول يوم حاولت ارضعه ماكان فيي حليب
وبعدين استخدمت جهاز الشفط بس خلاص تعود على الرضاعة لأن من اول ماجبته وهم يحطوا بعد سهاية في بوزه
ومايرضى يرضع مني
البارحة عطوني مواعيدهم متى يرضعوه عشان اذا ابغى ارضعه اجي قبل لا يرضعوه
ورحت عشان بارضعه الساعة 5 وصلت 4 ونص او 5 الا
الا يقولوا السخيفين رضعوه لأن كان يصرخ ومارضي يسكت
ووزنه قاعد ينزل بس يوم ارتفع وعود نزل اليوم وصل كيلوين و 60

وأمس كان وياه شوية صفار وحاطينه تحت اضاءة زرقة ومغطيين عواينه مرة عور بقلبي علاعمري
اليوم الحمدلله شالوها عنه راح عنه

دعواتكم حبيباتي ان شاء الله مايطول في الحضانة والله يعطيه الصحة والعافية ويقويه
مشتاقة أشوفه في حضني واحمله وقت ماابغى

وانتون الله يسهلها عليكم يارب العالمين

وش الأخبار أم فاطمة ؟؟ مابقى الا أنا وانت !!!!!! الله يسهل علينا ان شاء الله بعد شوي بسوي الأعمال لتسهيل الولادة ومابنساج من الدعاء ان شاء الله
وبدعي بعد للقمر سيد سجاد الله يحفظه ويحميه ياااااااااااارب نفسي أشوفه وأبوسه

ام فطوم بعد ماتاخذين فرة على المحلات خبريني أي أحسن فيهم أنا سمعت باتشي أحلى شي
يالا نلقاكم على خير بروح أسوي الأعمال وأنام تصبحون على خير وفي أمان الله وحفظه

هلا كروشة نورانيه .. وام سيد سجاد .. الف الحمد لله على سلامتش ياقمر وسلامة السيد الصغير ألف مبروك ماجاش ويتربي بعزش وعز ابوه .. والله اني قاعده اكتب لش ودمعة الفرحه في عيني .. يوم الله سهل عليش وولدتي طبيعي .. الحمد لله الحمد لله ..

ام سيد سجاد == ام زهراء سابقا .. ^_^ بالنسبة للرضاعه عودي ه يشرب منش حتى لو رفض في البدايه مرة ومرتين بيتعود وبيصير يرضع منش عادي .. طمنينا عنه وعن صحته وبالغه فيه معرس ...

الله يسلمكم تسلموا ياقلبي كله بفضل دعواتكم
والله يسهلها عليكم يارب بحق هالليلة
متباركين

توني راجعة من المستشفى اليوم سووا ليه تحاليل دم علا عمري ويقولوا كل شي سليم والهيموقلوبين زين
يوم اتصل الظهر اسأل عنه قالت الممرضة تحاليله سليمة قلت ليه اجل ليش مااقدر اطلعه اليوم قالت ماادري يمكن بكرة
وقلت بكرة باروح الصبح باشوف الدكتور وباخذ ويايي الأغراض خلاص أبغى أطلعه
من ليلتين شفتهم يسبحوه وهو قاتل روحه من الصياح عور بقلبي أحس الممرضة متوحشة

على طاري السبوح صحيح اسبحه كل يوم عادي؟
وكانت الممرضة تغسله بس بالشامبو تقول لأن بشرته حساسة ومو زين ليه الصابون .. متى أستخدم ليه أجل هالأشياء؟ الصابون والزيت واللوشن؟

والسرة الحمدلله اشوفها طاحت كيف أعتني بها اللحين عشان اللي ظل؟

بالنسبة للرضاعة أم فاطمة قلت بستنى بكرة باحاول فيه براحتي اذا طلع بالسلامة
أني قلت بعد باسوي جذي أبغاه لأن يرضع بس مني وباحاول فيه
في المستشفى الى امس واني احاول وهو مايعرف

طمنوني عنكم انتون شخباركم؟
بدأتوا مشي طبعاً صح؟
خلصتوا التجهيزات؟

ايه باقول ليكم صحيح عن عسل أخذته قبل لا اولد يمكن بـ 4 أيام
لأن زي ماقلت ليكم كان وزني في آخر موعد نازل عن قبل فقال ليي الدكتور آكل عسل
ورحت السنان وشريت ليي عسل خاص حق فترة الحمل
وصرت آكل منه كل يوم مرتين ثلاث
حتى أختي ورجلي شكوا اني ولدت منه

يالله انتبهوا لروحكم
في حفظ الرحمن (F)

هلا غناتي أم فطوم
اني والسيد الحمدلله بخير
توني جاية من عنده قالوا بيطلعوه اليوم
مايجي الاستشاري الا العصر الساعة 3
يالله الحمدلله بنفتك من هالمشاوير
يقولوا مخليينه يوم زيادة لأنه في الرضاعة ماكان يعرف يمص عدل
ولا احد قال ليي من الممرضات ولا يدروا بالدنيا
يالله الحمدلله هو اهم شي بخير

بالنسبة لزيت جونسن .. هو للشعر صح؟
شكلي زيش حتى البودرة مابستخدمها اللحين
واول شهر يمكن اسبحه بس بالشامبو

وبعدين ويش ناوية على روحش ويا هالدرج
انتبهي لروحش غناتي

والعسل اسمه سمر اليمني
هو غامق شوي وطعمه مو ذاك الزود
أني بعد ماكنت آكل العسل ولا أحبه بس في الحمل آكله
عن دوى على قولتهم

صحيح نورانية لاحظت انها اختفت
ان شاء الله المانع خير
الله يحفظكم ويسهل عليكم
يالله باقوم أنام ليي ساعة لو شي صار ليي يومين ماأنام زين عشان أكون جية سجادي

صحيح بالنسبة للرضاعة .. أرضعه زي المستشفى كل 3 ساعات حتى لو هو نايم؟!!