دردشة خاصة بالحوااااااااامل

شحالكم؟ شخباركم؟
إن شاء الله بخير
أني اسمحوا ليي قليل صايرة افتح جهازي وأشبك
نورانية ماتشوفي شر غناتي حاسة فيش
أني في مواعيدي ولله الحمد تقول ليي الدكتورة كل شي سليم واني ماانام من المحاتى والخوف شحال انتين
ان شاء الله فترة وتعدي على خير

أم فاطمة شخبارش؟
قواش الله
الله يوفقش ويسهل عليش يارب ويعينش
ويش تدرسي؟

اني صار ليي اسبوع يمكن لو اقل ضاربني خولنج ومتأذية منه مرة
ومستملة أروح المستشفى
وقريت عن الفولتارين انه مو زين في الشهور الأخيرة من الحمل واخاف اروح مستشفى يعطوني مسكن او ابرة وبس
الليلة موعدي متابعة المغرب قلت باروح وباقول ليها وباشوف
ماسك ليي ظهري وكتفي وصدري

وبالنسبة للأغراض خلصت الأشياء الثقيلة
شريت السريرين من سنتر بوينت
باقي الدولاب بس اذا مو ناسية شي

بسألكم
بدأتوا تستخدموا كريمات؟ لتشققات البطن او هيك شي؟


الباقيين مرة مختفيين مو مبينين إن شاء الله المانع خير

شحالكم؟
بالنسبة للأناناس اول مااكلته حتى نوم ماجاني من الخوف
ويوم ثاني حسيت حركة البيبي مو واجد
بس خليتها على الله وامي بعد قالت ليي لا تخافي وخليها على الله
لأن بعد اللعام سقطت في اسبوع 30 عشان جذي اللحين مواعيدي اسبوعية من بعد الاسبوع 30
والله يتممها لينا كلنا على خير
الدكتورة قالت ليي أحسب حركة البيبي من اول مااصحى اهم شي في اليوم مو اقل من 10 حركات
واذا اقل اروح ليها تشيك على النبض
بس الحمدلله الـ 10 رفسات يجوا من اول مااقعد يجيه نشاط مو طبيعي
نسيت ماقلت لش نورانية
اني بعد ماباكمل 40 اسبوع يمكن اولد بداية التاسع
ماتدري يمكن نولد ويابعض
شخبار صحتش اللحين؟

أم فاطمة
الله يوفقش في الدراسة
سمعت عنها واللحين اختي وحماتي سجلوا فيها للسيمستر الثاني
اللي عجبني فيه ان الانقلش تدرسيه لغة مو أدب
كيف الدراسة بهالاسلوب؟ حليوة؟

ايه ودي وياش فطوم خليها تشوف اخوها

اني موعدي اللي فات الخميس كان الحمدلله كل شي تمام بس كان الهيموقلوبين نازل واللحين آخذ ابر وريدية كل يوم وترك لمدة 5 مرات
وموعدي الجاي ورى بكرة السبت

يالله أشوفكم على خير

نورانية طمنينا عليش

هلا ام زهراء اخبارش ونورانيه شخباركم الظاهر ماظل احد في هالتجمع الا احنا لا تقطعو كل يوم لا مداكم انتين دخلو طمنوونا عنكم
الحمد لله توني المغرب جاية من اختباري .. الحمد لله ان شاء الله اجيب علامة حلوة
بس لانه كان حر مو طبيعي وحسيت نفسي قاعده اغلي من الحرارة في القاعه وكنت بسرعه ابغى اسلم الورقه واطلع مع اني لابسة صيفي بس ماقدرت اتحمل الحر هههههه
اممم ام زهراء اني اللحين ثالث مستوى الدراسة حليوة بهالنظام وتوني هالسمستر موادي صارت كلها تخصص اول شي كنت ادرس مواد عامة والانجليزي عندنا لغة زي ماقلتي بس اتوقع انه خليط بين اللغه والادب للحين احنا كله لغة اللي اخدناه .. والبنات كلما جا ليهم يزيدو عن قبل
كل سمستر بنات واجد يسجلو اقول لش المستوى اللي راح المدرسة اللي كنا نختبر فيها كانت فاضية اليوم يوم رحت مرة تفاجأت بالسيارات والبنات زحمة مرة وحتى الاولاد زاد عددهم اني اللي عجبني في ده النظام انه الرسوم تعتبر جيدة نسبيا كجامعه حكومية ووعلى الله ناخد هالبكالريوس اني طلعت روحي ولليحن ماخدته ..
المفروض اليومم اسوي لي موعد بس ماسويت مامداني الوقت
مادري متى باسويه احس اني المفروض اروح واهتم بنفسي اكثر بس مادري كله مالي خلق لشي
انتين لا رحتي موعدش طمنينا عنش وتبغي تولدي ويا نورانيه عني وتخلوني ها مافي لازم اولد وياكم مو علي كيفكم ^_^
يالله مابقى شي علينا هانت احس الشهور بسرعه مشت الله يسهل علينا يارب ونجيب احلى نونوات ..

هلا نورانيه قمر أسعدني مرورش اخبار صحتش ..
تصدقي للحين مااشتريت ولا خلقة ماني مصدقة بفطوم كيف اول ماعرفت اني حامل ركضت السوق واللحين احس نفسي ماني متحمسة للتجهيز يمكن علشان الاختبارات جايه في وقت مو اوكي واخاف امشي في السوق وايد اولد للحين مو وقتها .. بس شكلي الاسبوع الجاي لازم باروح اخاف يخلص التخفيض واجهز بعدين بدون تخفيض
تصدقي نورانيه حتى اني خايفة مرة من الولادة .. ومادري وش بيصير خاصة انه ولادتي بفطوم عمليه كانت وكله تجي لي افكار وكيف تعذبت في العملية واللحين خايفة عدل مادري وش بيصير وخايفة اكثر من الم الطبيعي واحس جايتني حالة قلق مرة قويه .. بس اول ماتجي لي الافاكار السلبيه اتعوذ من ابليس واصلي على محمد وال محمد واقول ان شاء الله ببركة اهل البيت كل شي بيصير سهاله
الله يسهل علينا بحق هاليوم المبارك
اممم صار نفسي اشوف تجهيزش عدل من قلبي احسش اخدتي اغراض وايد اموت في اغراض النونوات ..
بالنسبة للفات لما رحت اخر مرة سنتر بوينت شفت عندهم لفات حليوين بس احسهم شوية ثقال على وقت ولادتنا وفيه وحده من قرايبنا تجيب طلبيات من مريكا للفات مميزة طلبت من عندها 3 ان شاء الله يوصلو قريب ..
انتبهي لصحتش ياقمر ولا تنسينا من دعائش اني وام زهراء والله اني ماانساكم وطول الوقت في بالي
اشوفكم بخير ..

نسيت اسالش نورانيه المقاس الي اخدتيه لاغراض النونو نيو بورن ولا من 0-3
اني محتارة قلت شكلي باخد بربتوزات 3 لعمر نيوبورن والباقي من 0-3
وحتى البيجامات الافرولات باخد يمكن 2-3 نيو بورن والاقي من صفر -3 ماحب الياهل يطلع شكله مو مرتب بثياب كبيرة ويش تقترحي عليي ^^ وتحسسيهم يكفو لو ازيد بعد النيو بورن هالمرة لاصرتي اوكي قولي لي مشترياتش علشان اشوف وش باخد اسهل لي لا رحت السوق ..
وام زهراء بعد قولي وش اشتريتي ومن وين ؟؟
خلونا نستفيد من بعض ..

شحالكم؟
الله يوفقش أم فاطمة
نفس حالتي اراكض ورى هالبكالريوس ولاني راضية احصله
هذاني اللحين ادور ليي مكان عدل في امريكا احول بعثتي عليه
قلت ابغى اروح بعد شهر رمضان كل البيبي كبر شوي وصرت احسن
وهذاني أمشي وأسأل

نورانية
ماتشوفي شر غناتي
الحمدلله انش بخير
تصدقوا اني للحين مافكرت في الولادة
كل همي ابغى بس البيبي يوصل بالسلامة واسمع صوته وودي اولد طبيعي
لكن مخلية الخوف لبعدين ويل بي على اللحين هالفترة احسب بس باقي عليي كم

ويايي بعد بواسير وانتون بكرامة من ذاك الشهر
وأستخدم مرهم موضعي وأشوفه يخف بس مايروح
هو مايألمني ولا أحس فيه بس خايفة وقت الولادة ينفتح لو شي

بالنسبة للمشتريات
سنتر بوينت طحت فيه طيح
السريرين شريتهم منه
وطقم السرير بعد كلهم منه
وشريت اللفات يمكن 6 ولا 7 شوية منه والباقي من هدية المولود وبريتي بيبي
والمفارش شريت 3 من سنتر بوينت وواحد من هدية المولود
زينين ولا شوية؟
أني كنت باخذ أكثر بس حماتي قالت زي 3 او 4 مفارش

أم فاطمة كأنش خوفتيني
أحس نفسي ماأخذت ثياب واجد للبيبي
البروبتوزات اخذت يمكن مجموعتين من مذركير مقاس نيوبورن
الظاهر صيفين او واحد صيفي وواحد شتوي مااذكر من زمان اخذتهم يبغى ليي أشيك :D
والأفرولات هذولا اللي فوق صح؟
أخذت بعد يمكن نفس الشي مجموعتين من مذركير
وعندي ثنين بعد شتويين من قبل من آدمز

وشريت بعد كيس من محل ماادري ويش اسمه لافتته خضرة
اني اخذته من الظهران بس فيه نفس المحل في ابن خلدون في وجه كوتون
عرفتوه؟
المهم الكيس فيه بدلة كاملة بروبتوز وافرول وقفاز وقبعة ولعبة وصدارية
مرة مرة يجنن قلت هذا الطقم اللي بالبسه وياه طلعتنا من المستشفى

وشريت بطانية من زارا هوم
هذا الكلام طبعاً صار ليه شهرين يمكن واني كل مااروح اشتري حاجة

واحس نفسي ماشريت الثياب واجد لأني ماني عارفة للجو واختي بعد طاحت في ماماز & باباز وقالت ليي خلاص لا تشتري شي من هالمحل ولا ادري ويش شرت شرت أغراض واجد

وثياب ليي شريت ليي بيجامتين شتويين مزررين
وشفت بعد بيجامة فيها زرارات من فوق نصها يعنو بس ماشفت مقاسي قلت باروح فرع ثاني
ودشداشتين من مذركير

اني قلت ماباخذ الا بيجامات اريح ليي وابغاهم كلهم مفتوحين أسهل للرضاعة

ويش بعد؟!!

ايه شريت بانيو صغنون من مذكركير تبعه روب وليفة وثرمومتر
وثلاث فوط مجموعة من مذركير احجام مختلفة وناعمين حليوين وفوطة من ماماز & باباز

و4 قبعات تقريبا و4 قفازات

ومشط وفرشاة طبعاً ومقص أظافر مع مبارد
وسهايات من مذركير ثنتين
وعضاضتين من مذركير بعد


استنوني راجعة ليكم
<<<<<<<<<<< ماصدقت على الله أحد سألها

ياعلي متى يجي ربيع

ايه نكمل :D
شريت رضاعة وحدة صغيرة
لأني ماأفكر الا في الرضاعة الطبيعية

بالنسبة لطقم السرير اللي في بيت أهلي شريت بعد زيه شنطتين كان عليهم تخفيض من 200 وشوي الى 90 وكل وحدة شريتها من محل قلت ماتسوى ارجع وحدة واحجامهم مختلفة
وسلة بعد من نفس الطقم

باقي بس الدولاب الصغير اللي باحطه في بيت اهلي ماني شايفة يناسب الطقم واستنى بريتي بيبي قال بيجيب هالفترة
والدولاب الكبير اللي في الشقة استنى نروح شارع التلفزيون نشوف بكم
شفت المسحر مااذكر شفتهم بكم بس كان غالي شوي

كنت أفكر آخذ جهاز تعقيم الرضاعات لكن حسيته ماليه داعي قلت حرام بـ 300 وشوي يمكن ويمكن مااستخدمه

يالله روحوا اشتروا وتعالوا طمنوني عشان اذا ناقصني شي الحق وقت التخفيضات اروح

ماشاء الله ام زهراء احس ودي اجي لش واشوف اغراض البيبي كلهم فديته بس متى يجي بالسلامة ويقطعم ويكسرهم وبنتفهم بالعافيه
راجعه بعدين باعلق على مشترياتش حاجة حاجة ..
ياعلي اني احس ولدي مسكين ماشريت ليه شي هههههههههه
شكلي باتقاسم غاراضش وياش ^^

تسلموا ياقلبي
ومنكم نستفيد خبركم توني جديدة :D

اليوم رحت موعدي والحمدلله كل شي تمام
وموعدي الجاي السبت الجاي شكلي تخليصتي بامر الظهران مذركير
الصداريات اخذت مجموعة فيها 3 بس شكلي باخذ زيادة من كلام نورانية
والبروبتوزات باخذ كم واحد صيفي ومن 0-3 لأن كل أغراضي للنيوبورن

الله يبلغنا كلنا شوفة نونواتنا ونفرح بهم ونلبسهم

نورانية ماتشوفي شر مرة ثانية لا تسكتي عن روحش روحي المستشفى اذا شفتي دم
انتين في آخر الشهور لا تنسي المفروض تنتبهي لحالش
ورجلش صادق اهم شي صحتش وصحة البيبي


يالله أم فاطمة أستنى تعليقش :D

يشبه هذا الموديل تقريبا هذي الصورة أكبر
هااااا وش رايكم أشتريه أو لا

وهذي صورة ثانية

وهذي صورة ثالثة تعبتكم

أنتظر رايكم أشوفكم على خير غناتي

هلا نورانية
شخبارش؟
بالنسبة للسلة كنت زيش كنت محتارة آخذها خاصة ان الفرش حقها اللي شفته في المحلات مرة حليو ولأني ماحصلت سرير حليو فرشه
بس ماحسيته عملي وزوجي مارضى قال آخذ سرير أحسن
والسرير الصغير مالقيت شي حليو اللي بغيته من سنتر بوينت وحصلته بعد مجهود وروحة وجية ودوارة في كل الفروع يوم بشتريه خلاص قال مافيه الا المعروض
فأخذت سرير حجم 130×70 او اصغر شوي
وأخذت نفس الفرش اللي كنت ابغاه للسرير الصغير وقلت مرة وحدة اني اجي واجد بيت اهلي وبيطول ويايي

بالنسبة للهزاز حليو اني بعد كان عاجبني بس اللي شفتهم ماكان ليهم ستارة او حواجز بس الشرشف يعنو وقلت بيصير بارد على البيبي

اذا تحسي انش بتطلعي به برى بالسلة اخذيها لأنها تشبه السرير الصغير وثنينهم مابيطولوا وياش بس حد اول شهرين
اما اذا تحسي مابتطلعي بها شوفي لش سرير عادي احسن عفر

شوفي أم فاطمة ويش تقول لش هي أخبر مني

هلا خيتو
وأخيراً افتكيتي وشريتي السرير
عليه بالعافية اللي مسمى باسمه
وسلامات مايشوف شر زوجش الله يحفظه لش ولعيالش
وانتين انتبهي لروحش مو ناقصة خلعات
الله يسلمش شدعوه خيو غير عطيتش رايي
ام فاطمة ايه صايرة تختفي واجد الله يوفقها
ان شاء الله ماترجع الا وهي تقول خلصت التجهيزات
متى متى يجي الشهر الجاي عشان اجهز شنطة المستشفى

يالله تصبحوا على خير