تجمع الأمهات ^_____^

موضوع: تجمع الأمهات ^_____^ 9/4/2011, 10:11

مرحبا كروشات الأمس أمهات اليوم ألف الحمد لله على سلامتنا كلنا .. وان شاء الله نفرح بعيالنا ونشوفهم معاريس ونعزم بعض على عرسهم ^^
فتحنا دردشة جديدة ..بدل دردشة الكروشات ..تفضلو هنا على طول وياليت نورانيه الغاليه تسوي ليه تثبيت ^^

وان شاء الله تكون دردشتنا مباركة كسابقتها بحق هذا اليوم المبروك ميلاد العقيلة زينب ومتباركين بالمولد والله يفرج عن أهلنا في البحرين بحق هذا اليوم العظيم ..

موضوع: رد: تجمع الأمهات ^_____^ 9/4/2011, 20:19

هلا وغلا بأم محمد وفاطمة
كيف الحال غناتي ..
بالنسبة للدكتور باقر للأسف مارحت عيادته ولامرة بس سمعت عنه انه مرة ممتاز
وبالنسبة للحبوب اللي في وجه حمودي ترى فطومة نفس الشي ولما اأسبحها وأحط زيت الأطفال حق الجسم مسحة خفيفة أشوفه يروح ويرد يرجع
عادي طبيعي لاتحاتين
احس نفسي مشغولة اكتب في الدردشة وانا أرضع خخخخخخ
وللحين يجوني ناس احس نفسي تعبت مو من الناس لا بالعكس احب يزوروني لكن لأني عندي مواعيد في المستشفى
واذا جوني ضيوف بعد مااجي من مشواري اتعب مرة مايمديني ارتاح
او اغير لفطوم صادف مرة من المرات جيت من المستشفى وعلى طول يادوب صليت ونظفت شوي الصالة وغيرت لفطوم الا دق الجرس

بصراحة ماتوقعت يجوني ضيوف وايد في الشقة لكن الحمدلله ارتحت مرة لما زاروني
بس مشكلتي احب يجوني في وقت يناسبني والا جيتهم تفرحني وتونسني ياليت يجوني على طول ماأمل منهم بالعكس وناسة
لكن احب اكون جاهزة ومستعدة ..
الا على طاري المستشفى قريت انه حمودي فيه ابوصفار صح وش اخباره راح عنه او لسى
ترى فطومة نفس الشي فيها ابوصفار ورحت بها المستشفى قالوا نسبته بسيطة 5ونص ماتحتاج تنويم بس قالوا لي اذا حسيتي انها ماترضع او جسمها خامل وزادت الصفرة جيبيها المستشفى
عندي موعد يوم الأربعاء الجاي وباشوف وش يقولوا لي
ان شاء الله يروح عنها وأمبى اروح أعالج أسناني وعندي بعد التهاب امبى اروح اتعالج احس حوسة
الا وش اخبار حمود مع المغص انا اخذت لفاطمة حليب صناعي وبس عطيتها رضعة لما رحت المستشفى هذاك اليوم معاناة ماسكتت من ألم بطنها زاد عليها وللحين الحليب مااستخدمته اقول بعطيها رضعة في اليوم وأرد اهون اقول لا مابعطيها الا للضرورة القصوى اكون طالعة مثلا مشوار

أم زهراء كيف الحال غناتي ووش اخبار سيد سجاد

موضوع: رد: تجمع الأمهات ^_____^ 18/4/2011, 21:09

أني أسألكم الدعاء
من ولدت للحين وأني تعبانة من ظهري مااقدر اتحرك وللحين قاعدة في بيت أهلي
رحت المستشفى المواساة كذا مرة دكاترة الناساء قالوا مافيي شي
ودكتورة الروماتيزم سوت أشعة وقالت آخر فقرة فيها عيب خلقي بارزة شوي جهة اليسار
وعطتني مسكنات ولا فاد
ورحت الزهراء وقالت ليي شد عضلي وحولتني علاج طبيعي خفيت بعد كم جلسة وصرت اقدر امشي لكن رجع عليي اللأم
ورحت اليوم لمراخة وقالت ويايي شد عضل قوي في الأوراك والعمود الفقري
وقالت ليي اتنقع كل يوم مرتين في ماي دافي وملح خشن وأشرب زموتة الين يوم الجمعة بترد تشوفني
والله تعبت مرة مااقدر اشيل واحط في ولدي
لا تنسوني من دعائكم

موضوع: رد: تجمع الأمهات ^_____^ 22/4/2011, 10:54

أم سيد سجاد ماتشوفي شر ياغناتي الله يعطيش الصحه العافيه يارب
لا تحاولي تتعبي نفسش
اللي اعرفه انه الم الظهر طبيعي بعد الولاده
ان شاء الله تخفي بسرعه ..
نورانيه فديتها فاطمة الحلوة اني أعطي حمود حليب من نستله اسمه نان بس مااعطيه كل يوم واخدت ليه شاي اعطيه ساعات لما اتعب من ترضيعه بالنسبة للصفار ماراح عدل بس خف وااااجد أحس عيونه فيها صفرة خفيفة امي تقول لي مو لازم توديه المستشفى لاني نفس الشي في صغري على قولة امي ظلت ويايي اصفيرة وايد وماتشوفي شر يارب قولي لينا وش اخبار الاتلهاب وياش ..
اني امبى اسالكم متى المفروض الوحده تلبس مشد بعد الولادة امبى البس بس ماني عارفه متى ..
علشان البطن لا يصير حوسة ههههههه

موضوع: رد: تجمع الأمهات ^_____^ 24/4/2011, 14:10

السلام عليكم حبوبات
ماتشوفين شر غناتي أم سيد سجاد الله يعطيج العافية والصحة
لاتخافين ألم الظهر ان شاء الله بيروح
انا جاني وطلع عندي نقص كالسيوم وبس أشرب الكالسيوم أصير أحسن
اخذتي تحاليل دم شفتي نسبة الكالسيوم ؟؟ مو احتمال يكون نقص
لأن النقص يسبب شد عضلي مرة قريت في النت هالمعلومة
انا جاني الم في الفقرات من تحت مو شد
ماأدري وش فينا انا تعبانة من الالتهابات كأني توني والدة
ومكان الغرز التأم من فترة لكن ملتهب
وماأقدر :أتحرك مثل أول على طول أحس بحرقان والم
صار عندي التهاب داخلي مو بس خارجي الله يعين أول مرة يصير لي
وللحين يجوني ناس ههههههه لكن مايجوني الا بعد موعد مو مثل اول لكن الله يعلم اني تعبانة مرة لكن مااعتذر لهم مااحب ارد احد
وحتى يوم اجتماع العائلة حتى لو تعبانة اروح حتى أمي لاتزعل واحاول اكون طبيعية مع الكل وأسولف واضحك عادي
لكن يومي كله جحيم لاادوية فايدة ولاغسولات وبعد بكرة بروح المستشفى واشوف وش القصة

:أم محمد
غناتي يمكن المشد مايصلح للي مسويين عملية قيصرية سوي بس تمارين خفيفة والرضاعة الطبيعية كافية انها ترجع الرحم لوضعه الطبيعي
ام حمودي ترى أبوصفار اذا نسبته بسيطة ماتخوف لكن اذا نسبته قوية خطير مرة
الله يكفي أولادنا الشر ويحفظهم ويحميهم
فطوم خف عنها أبوصفار لكن متعبتني ماتنام من المغص وأمي تقول بنتش ماعندها اخلاق كله تصيح
صحيح من أول ماأروح بيت أهلي لين أطلع وهي واء واء الله يعيننا متى بس تكبر ؟؟
والحليب الصناعي ابتلشت فيه مو راضية تشرب بالمرة أسويه عالفاضي
خسارة ...
يالا باروح عنكم الحين فطومة ماتعطيني وقت أحك راسي
أشوفكم على خير

موضوع: رد: تجمع الأمهات ^_____^ 10/5/2011, 11:04

شحالكم أمهات؟
وحشتوني من زمان ماأسمع أخباركم
أني الحمدلله هاليومين صرت أحسن على ايد هالمراخة
تقول تقرطع ظهري وأني أولد ولا حسوا ليي
والحمدلله رب العالمين
تصدقوا كنت حتى أنام بدون مكيف في هالحر
وسجود زين الحمدلله
شخبار كتاكيتكم انتون؟
بالنسبة للمشد اني مااستخدمته لأني أصلاً عصاية ودبتي ماكانت كبيرة
فمافكرت فيه اصلاً
أني اللي قاهرني اللحين التشققات مااهتميت فيهم واني حامل
كنت استخدم زبدة الكاكاو بس مو كل يوم وهذاهم بينوا

بسألكم عن الأكل
متى بتأكلوا أولادكم؟
أني كان في بالي الشهر الجاي اذا خلص الرابع يعنو
بس الدكتورة قالت مو قبل السادس
وقريت ان اللي يبدأوا وياهم في السادس صعب يتقبلوا ياخذوا وقت
فشكلي بابدي الشهر الجاي

يالله تعالوا رجعوا النشاط شوي لهالقسم

موضوع: رد: تجمع الأمهات ^_____^ 11/5/2011, 09:13

هلا وغلا بأم سيد سجاد

الحمدلله على سلامتج وماتشوفين شر غناتي
مشتاقين لسواليفش
انا بعد ستة ايام من الولادة راح بطني كله وصرت ماشاء الله رشيقة ماكأني كنت حامل لأني أساسا ضعيفة وكل الي يجوني تعليقات على وزني قليل اذا ماعلقوا مع اني ماكنت متينة بالعكس لكن ضعفت بزيادة بسبب سكر الحمل لأني كنت على الحمية لكن الحين مع الرضاعة صرت آكل بكثرة ووزني صار يزيد
وزوجي عاجبه يقول لي احسن ماتناسبني النحافة بس انا مو عاجبني شكلي...
ودي ماآكل لكن شهيتي مفتوحة دايما يمكن لأني آآخذ فيتامينات للرضاعة
المهم الصحة مو شكل الجسم انا الحمدلله صرت أحسن مع العلاج
وبنوتتي طعمتها لما كملت شهرين وعشت معاها معاناة يومين حرارتها كانت مرتفعة وتصرخ من الألم
والحين تعودت على الدلع دايما محمولة واتمشى معاها وماتسكت الا بالهز وصايرة مرة دلوعه متعلقة فيني من ياخذها احد ثاني تصيح بأعلى صوتها
بالنسبة للأكل تقدري غناتي تأكليه تمر بالتدريج كل يوم شوي لين تصير تمرة وحدة في اليوم غسليها مضبوط و شيلي النواة والقشرة واعجنيها
تمام واكليه
هذا كلامهم لي في المستشفى وهو أساسا من السنة النبوية الشريفة التحنيك بالتمر مفيد للمولود من ولادته
وبعد مايكمل 3 شهور مع بداية الشهر الرابع واكيد الحين كمل اكليه سيريلاك بالتدريج لأن معدة الطفل ماتتحمل اكل دفعة وحدة يعني ابدأي بربع ملعقة كأنه يتذوق
وزيدي الكمية كل يوم لين تصير وجبة كاملة مانصحج تأخرين تأكيله اذا فهم بيعاند ويمكن مايستطعم الأكل ويتعبش

ام محمد وين رحتي وحشتينا

موضوع: رد: تجمع الأمهات ^_____^ 11/5/2011, 11:37

هلا بنوارنية
اني من ولدت للحين وشهيتي كلا مقفلة وماأشتهي آكل
حتى الدكتورة لما شافتني قالت فكرت عندش انيميا بس حديدي زين
قلت ليها تعطيني حبوب فاتح شهية قالت ماينفع مافيه حبوب تفتح الشهية
بالنسبة للأكل
سجود اللحين دخل الرابع الاسبوع اللي راح لسى ماكمله
يعني اعطيه من اللحين؟
ويشو أحسن شي أعطيه نوع واحد صح؟
قريت ان القمح ثقيل على معدتهم
أبدأ بالرو مثلاً أو الموز؟

والتمر كان من اول ماجبته اذا يصيح ولا يرضى يشرب كانت أمي تعطيه تمرة ملفوفة بقطعة شاش يمصها
ويوم سألت الدكتورة قالت لا تعطيه
باجرب اعطيه نتفة صغيرة
ياعمري ماني مصدقة انه بياكل الليلة او بكرة باخذ ليه سيريلاك

مرة حليوة السوالف صارت وناسة :D

موضوع: رد: تجمع الأمهات ^_____^ 11/5/2011, 16:38

هلا غناتي

اذا ترضعين طبيعي لازم تاخذين فيتامينات خاصة بفترة الرضاعة خاصة انش فاقدة الشهية غريبة الدكتورة ماكتبت لج فيتامينات
وماعليش من الدكتورة أيهم أعلم النبي الأعظم صلى الله عليه وآله وسلم أو الدكتورة أحسهم الدكاترة يبالغوا هذا مايصلح وهذا ممنوع .. التمر معروفة تركيبته
سهل الهضم لكن لاتكثري منه حتى لايجيه مغص ويكون أفضل بالتدريج حتى تتعود معدته عليه
تقدري تعطيه بالرضاعة تغلي ماي وتحطي فيه تمرة وتهرسيها مضبوط وتصفيها وتعطيها الطفل منقوع التمر ترى مفيد مرة
خاصة اذا بدأتي تأكلينه لأنه ملين والسيريلاك معروف يجيب لبعض الأطفال امساك
بصراحة عن تجربة أحسن شي تأكليه الحين ولاتخافي بتصير صحته أحسن أنا أولادي دايما أأكلهم من بداية الشهر الرابع وبسم الله ماشاء الله
صحتهم كانت ممتازة
لكن أهم شي التدريج عندي كتب روعة عن تغذية الطفل والعناية به
واحد منهم المؤلف دكتور معروف ومشهور
قريت فيه انه الطفل لازم تأكليه صنف صنف وماتعطيه في البداية أنواع حتى تكتشفي اللي يناسبه واللي مايناسبه موكل الأطفال يناسبهم بعض المأكولات مثلا البعض الموز مثلا يسبب لهم حساسية وبعضهم القمح يسبب لهم اكزيما واذا حسيتي انه الطفل تأثر وسبب له حساسية وقفي تأكيله هذا النوع اللي مسبب له حساسية وانتظري الى الشهر السادس وابدأي من جديد بتأكيله نفس النوع اللي تاثر منه لما كان في الشهر الرابع لكن بكميات قليلة واذا تأثر منهم اعطيه أنواع ثانية يعني كل مرحلة تدخلي نوعية معينة من الخضروات المسلوقة او الفواكه المهروسة وتنتظري يومين ثلاثة حتى تشوفي تأثيره واذا ماتأثر اعطيه وبالنسبة للفواكه كنت اعطيهم مع بداية الشهر الخامس او احتى في الشهر الرابع النص منه اذا تمبي تعطيه طبيعي مو معلب اغلي ماي وحطي فيه ربع تفاحة وزيدي الكمية بعدين المهم قشريها واسلقيها على نارهادية واهرسيها بالشوكة بتصر مثل المربى وفيه معلبات في الصيدلية لكن مافي احسن من الطبيعي والموز بصراحة ثقيل على معدة الطفل اعطيه قليل مرة ولازم تكون ناضجة مرة اهرسي جزء منها واعطيه في الشهر الخامس شوفي وش اللي يناسبه واذا مافيه مشاكل
اعطيه لاتحرميه
وصفار البيض لازم أطفالي أعطيهم في الشهر السادس لأنهم يحتاجوا الى الحديد في هذا الشهر بالذات لأن تزيد حركتهم ونشاطهم ويبدأو بالحبو ولازم يكون بكمية قليلة في البداية ترى كل شي بالتدريج مايكمل عشرة شهور الا خلاص تعود على الأكل مضبوط وبدأ ياكل أكل السفرة العادي انا أذكر كنت اعطيهم بالتدريج واحاول اتجنب المعلبات اللي في الصيدلية قدر الأمكان اعطيهم كل شي طبيعي
وعصير البرتقال انتبهي منه لأن بعض الأطفال معدتهم تتأثر منه وتسبب لهم حساسية خففيه بماي هدرت وايد واتوقع هالمعلومات يمكن تعرفيها لكن زيادة الخير خيرين حبيت اقول لج من تجربتي لأني مو أول مرة أربي ومجربة تأكيلهم من البداية يعني لاتخافي اعطيه وتوكلي على الله

موضوع: رد: تجمع الأمهات ^_____^ 11/5/2011, 17:04

هذا الموضوع شفته في النت وقلت اضيفه يمكن يفيدنا كلنا تغذية الطفل خطوة خطوة .

بسم الله نبدأ.................

إن الحليب هو المادة الأساسية التي تقوم عليها تغذية الطفل حتى الشهر الرابع من العمر, إذ أنه يحوي جميع العناصر اللازمة لنموه حتى هذا العمر. و بدءاً من الشهر الرابع يحتاج الطفل إلى مواد أخرى لا تتوفر في الحليب حتى يكتمل نموه و يستمر بصورة صحيحة, و هنا على الأم أن تبدأ باطعام طفلها تدريجياً.
و حتى يستطيع الطفل أن يأكل الطعام بصورة طبيعية, فلا بد من أن يتم ذلك وفق برنامج محدد تدريجي, و إن أكثر الصعوبات التي تعترض الأم ناتجة عن إطعام الطفل بصورة غير صحيحة.
و في ما يلي برنامج مبسط لاطعام الطفل حتى الشهر التاسع.

تغذية الطفل من بداية الشهر الرابع حتى بداية الشهر الخامس

الافطار: حليب الأم أو 180 مل من الحليب الصناعي

الساعة10: 1- حليب الأم أو 180 مل من الحليب الصناعي
2- خضار مسلوقة و مهروسة بالتدريج:
ملعقة كبيرة لمدة خمسة أيام
ملعقتان كبيرتان لمدة خمسة أيام
ثلاث ملاعق كبيرة حتى نهاية الشهر

ظهراً: حليب الأم أو 180 مل من الحليب الصناعي

عصراً: 1- حليب الأم أو 180 مل من الحليب الصناعي
2- ثلاث ملاعق صغيرة من عصير الفواكه

العشاء: حليب الأم أو 180 مل من الحليب الصناعي

تغذية الطفل من بداية الشهر الخامس حتى بداية الشهر السادس

الافطار: حليب الأم أو 180 مل من الحليب الصناعي

الساعة 10: 100 غرام من الخضار المسلوقة و المهروسة

ظهراً: 1- حليب الأم أو 180 مل من الحليب الصناعي
2- لحم مهروس ممزوج بخضار مسلوقة مقدار 4 ملاعق كبيرة

عصراً: 1- حليب الأم أو 180 مل من الحليب الصناعي
2- عصير فواكه ( نصف كأس صغير)

العشاء: 1- حليب الأم أو 180 مل من الحليب الصناعي
2- نصف صفار بيضة ممزوج مع 50 غراماً من الخضار المسلوقة و المهروسة ( 1\4 أوقية)

أود أن أنبه على تجنب بياض البيض حتى السنة الأولى لتفادي الحساسية

تغذية الطفل من بداية الشهر السادس حتى بداية الشهر التاسع

الافطار: وجبة حليب ( رضاعة أو 250 مل)

الساعة 10: 150 غراماً من الخضار المسلوقة و المهروسة (3\4 الأوقية)

ظهراً: 1- 150 غراماً من الخضار المسلوقة و المهروسة (3\4 الأوقية)
2- لحم مفروم و مهروس 15 غراماً ( ملعقة كبيرة) ممزوج مع خضار مسلوقة و مهروسة

عصراً: 1- عصير فواكه (كأس صغير)
2- فواكه مهروسة و مسلوقة

العشاء: 1- حليب ( رضاعة أو 250 مل)
2- خضار مسلوقة و مهروسة (100 غرام = 1\2 أوقية)
3- صفار بيضة كامل مهروس و ممزوج مع خضار مهروسة مسلوقة أو أحد أشكال المواد الغذائية الصناعية الموجودة في الأسواق

ملاحظات:

- بالنسبة لصفار البيض, يجب أن تكون مُسوَّاة ومذابة في ملعقتين من الحليب، فيجب ألا تكون جامدة حتى لا تلتصق بأعلى فم الطفل ويصعب عليه تناولها، وهذه الوجبة تَمُدُّ الطفل بالبروتين الحيواني وبنسبة من فيتامين (أ) الذي يسمى فيتامين النمو، بالإضافة إلى عنصر الحديد.

- الخضار المسلوقة من الممكن أن تكون كالتالي:جزر وبطاطس وبازلاء وفاصوليا وكوسة وكرفس وإذا لم يوجد كرفس يمكن إضافة البقدونس، مع مراعاة عدم زيادة نسبة الجزر والبطاطس حتى لا يصاب الطفل بالإمساك، وأن تكون هذه الإضافة جميعها بكميات قليلة ليأكلها الطفل طازجة.

- العصير: عبارة عن عصير البرتقال شتاء، أو عصير الجوافة أو عصير الطماطم صيفًا في حالة عدم وجود البرتقال، حتى يحصل الطفل على احتياجاته من فيتامين c؛ ليقوى جهاز المناعة في جسمه ويحميه من الإصابة بالأمراض.

- ينصح أن يتم تناول الطعام باستخدام الملعقة والكوب والطبق، وعدم استخدم (البيبرونات أو التيتينات)، فقد نادت منظمة الصحة العالمية بمنع استخدامها منذ أكثر من عشر سنوات؛ لأنها تجعل الطفل يعتاد على الثقوب الواسعة لحلمات الببرونة ويمل الثقوب الضيقة لحلمة ثدي الأم حتى لا يبذل مجهودًا في عملية المص أو الشفط، وثدي الأم هو التغذية المثالية التي يجب أن تستمر حتى نهاية السنة الثانية من عمر الطفل بجانب الأغذية التكميلية.

- البقول يجب أن تكون خالية من القشور حتى يمتصها الجسم.

- من الشهر السابع يضاف للوجبات الأربع بعض العناصر الغذائية الجديدة، فمع الوجبة الثانية يمكن وضع الأرز مع الخضار لأن الطفل في هذه المرحلة يستطيع التعامل مع الحبوب، مع مراعاة أن يكون الأرز تام الاستواء.

- خبراء التغذية لا ينصحون باستعمال أغذية سابقة الإعداد؛ لأنها صورة من صور القمح أو الحبوب أو الخضراوات مع احتوائها على مادة حافظة ومكسبات طعم ورائحة ومواد للتلوين والتحلية، فالبعد عن هذه الكيماويات أفضل؛ لأن كبد الطفل أقل من أن يستوعب أو يتحمل إضافة كيماويات للجسم.

بلهنا والشفاء
لأطفالنا
اتمنى كل الامهات يستفيدوه من المعلومات عناغذية الاطفال..

موضوع: رد: تجمع الأمهات ^_____^ 12/5/2011, 14:34

هلا نورانية
لا تذكريني بموضوع الرضاعة
يوم تعود سجود على الرضاعة وطبعاً كنت أول أرضعه طبيعي وبعدين أكمل ليه صناعي لأن حليبي مايكفي
قالوا ليي الدكاترة اوقف الرضاعة لأني أشرب حبوب مو زين ينتقل اليه
ولما رحت موعدي الروماتيزم تفاجأوا لما دروا اني ارضعه
وتخيلي اني لما ولدت ماقالوا ليي شي لما جيت بطلع من المستشفى
لا ووصفوا ليي الأدوية عادي ويدروا اني بارضع طبيعي ماقالوا ليي مو زين
المهم
بالنسبة للأكل عشان افهم كل شي مزبوط
التفاحة من اللحين اسويها ليه صح؟
طيب وجزر وبطاطس بعد ولا بس تفاح اجرب وياه؟
امي تقول السيريلاك اللحين مايقدر عليه واني ابغى زي ماقلتي اعطيه كل شي طبيعي
ابدأ وياه مرة وحدة ولا ثلاث مرات اعطيه؟
بسألش نورانية
تعطي أولادي سهاية؟
أني ماكنت أعطيه الدكتورة قالت ليي تجيب ليه غازات
بس لما رجعت شقتي صرت اعطيه في الليل اذا ابوه نام وتعود عليها

موضوع: رد: تجمع الأمهات ^_____^ 14/5/2011, 20:04

هلا وغلا أم سيد سجاد
اول شي التفاح مقدار ملعقة وحدة في اليوم وزيدي الكمية بالتدريج لين تصير وجبة كاملة و بنفسه الطفل اذا شبع بيوقف
لاتستعجلي عليه حتى تتعود معدته ..
والخضار عادة الطفل مايستطعمه في هذا العمر الأفضل قبل ماتعطيه الخضار المهروسة اعطيه ماء الخضار المسلوق
يومين بعدها اعطيه جزر او بطاطس او كوسة مسلوقة بدون ماتخلطيهم يعني كل صنف لوحده وتنتظري كم يوم اذا اوكي تقبلهم وما سببت له حساسية او اسهال او امساك او عسر في الهضم
لأن الأطفال يختلفوا من ناحية التأثر ويختلفوا بعد في تقبل الأطعمة
المهم اذا حسيتي انه ماتأثر
اخلطيهم كلهم واعطيه كل يوم وجبة خضار منوعة مع وجبة فاكهة يعني وجبتين في اليوم
واذا حبيتي تعطيه السيريلاك بتكون 3 وجبات في الصباح سيريلاك وبعد الظهر فواكه وفي المغرب الخضار وبينهم بيكون الحليب طبعا ولاتنسي اذا بدأتي في تأكيله تعطيه ماي كمية قليلة بين الوجبات وعلى مايتعود على الخضار والفواكه
بيكون دخل الشهر الخامس ابدأي اعطيه عصير بالتدريج ولاتنسي عصير البرتقال لاتعطيه حامض
يعني اذا كان فيه حموضة خففيه بماي معدته ماتتحمل الحموضة وبعضهم يجيهم طفح جلدي وحساسية من البرتقال اذا لاحظتي
احمرار في جسمه على طول وقفيه وجربي تعطيه نوع ثاني لكن بكميات قليلة وتزيدي الكمية مايدخل الشهر السادس الا خلاص معدته تعودت واعطيه في الرضاعة رضعة كاملة مثل الحليب بالضبط
مايكمل ستة شهور الا خلاص تعود تعطيه بعدين الرز المهروس وصفار البيض وكل شي تضيفيه بالتدريج مو دفعة وحدة حتى لو كبر بعدها تضيفي بالتدريج اللحم والدجاج المهروس وانتبهي من السمك بعضهم يسبب لهم حساسية عشان كده الأطباء يحذروا منه بعضهم يقول لازم يكمل السنة بعدين تعطيه بعد يعني جربي وشوفي لاتستعجلي يعني على عمر 10 شهور بيكون ياكل أكل السفرة مثل مايقولون
.. هدرت وايد عن أشياء واستبقت الأحداث لكن لشهور تمر بسرعة مانحس في الوقت يمر مر السحاب بروح انوم فطومة وراجعة في وقت ثاني
تصبحين على خير غناتي
ايه نسيت السهاية بس فطوم استخدمتها ايام الأربعين لأنها تعبتني ماتنام من ألم بطنها بعدها رميتها وماأنصحش فيها ابدا اذا كبر
يعني حاولي من الحين قبل مايفهم تشيليها ولاتعطيه مرة ثانية
مو بس تسبب غازات تأثر على أسنانهم اذا ظهرت لهم وبيتعبش لأنه اذا فهم مابيرضى يتركها بيصيح فترة طويلة ولايمكن ينساها بسهولة عكس الحين بعده صغير

موضوع: رد: تجمع الأمهات ^_____^ 18/5/2011, 02:01

صباحكم خير إن شاء الله
مشكورة غناتي على المعلومات أفدتيني واجد
بدأت وياه من اربع ايام يمكن أعطيه تفاح
عاد امي ماترضى تعطيه ملعقة وتوقف لازم كل الا سوته
واني خلاص واثقة في امي لأن هذا اللي كانت تسويه لينا
والحمدلله في ثلاث ايام زاد 100 جرام
امس بعد رحت وياه المستشفى عيونه كلا تدمع وتطلع افرازات وفيه حبة طلع علاعمري وياه عدوى بكتيرية من الجو
وهذاني استخدم ليه مرهم وقطور
شخبار فطوم وياش؟
صحيح على السهاية وقفت كمن يوم من قلتي ليي وهذاني لسى احاول وياه البارحة عطيته شوي واليومين اللي قبلهم ابداً ماعطيته
وهذاني لسى احاول مرة صعب احس

مرة وحشتني ام فطوم الثانية من زمان عنها

موضوع: رد: تجمع الأمهات ^_____^ 27/5/2011, 16:06

هلا وغلا شخباركم ياحلوين وحشتوووووووووووووووووني وااااااااايد واااااايد ووحشتني سوالفكم الحلوة والله طول الوقت على الي بس ماعندي وقت ادخ النت وايد سيد سجاد كبر القمر وصار ياكل ياسلام وفطوم صارت دلوعه بعد زي فطومتنا هههههههه الله يخليهم يارب .. اني كنت مشغولة وايد وللحين والله يهال وقاعده انقل اغراضي للشقة الجديدة واختبارات الجامعة اللي بكرة تبدي دعواتكم لي .. عجيتني سوالفكم عن تأكيل اليهال عفر تحمست وايد شكلي بكرة باعطي حمودي رضاعة فيها تمرة زي ماقالت نورانيه عجبتني الفكرة ..يعني مايصير نعطي الياهل عصر من اللحين
اني حمودي كنت اعطية صناعي واللحين وقفت بس بكرة اختباراتي افكر اخد ليه اما السهاية ماعطيته صار يمص صبعه هههههههههه قالت امي لو عاطتنه سهاية كان مامص صبعه وش اسوي ليه اخترع ليه سهاية .........نورانيه وش اخبار الحبوب اللي في وجة فاطمة .. اني حمودي وجهه تعبأ حبوب صار كنه اكزيما بس خليته لوحده وبدا يخف اللحين تقريبا اختفى بس جسمه كله كان كله حرار واحسه خف بس للحين يتقشر واحس جسمة صاير جاف يعني رجايله واياديعه واحط علية زيت سيباميد او فازلين بس ماحسه يرطب عدل امي وام زوجي بس يهدرو عليي وديه المستشفى وابوه من جهة ثالثثة مايحب المستشفيات ويقول لي مافيه شي ولاني عارفة وش اسوي وياهم اخرتها بيجننوني
اي وش بعد ام هذا الجلد اللي في راس البيبي كيف يتعاملو وياه امي قالت حطي زيت ومشطيه وهذاني كل يوم اسوي بس للحين ماراح لت لابوه شكلي في النهاية باحلقة على الصفر علشان ينشال كله ولا يصير فيه قشرة لانه اللحين صاير كانه قشرة هو اصلا قشرة هههههههه يلا اخليكم اللحين ان شا الله باحاول ادخل اشوف سوالفكم الحلوة جدا سلامي الحالا لكم وقبلاتي للنونوات
^^

موضوع: رد: تجمع الأمهات ^_____^ 28/5/2011, 22:16

هلا هلا بأم حمود
وأخيراً بينتي
شخبارش وشخبار حمود وفطوم؟
وشخبارش ويا الامتحانات
اني بعد اختي امتحاناتها وياش نظام الدراسة عن بعد
الله يوفقكم جميع ويخلف تعبتكم
بالنسبة للسهاية أني عطيت سجود سهاية شهر يمكن وهونت عنها صار ليي اسبوعين يمكن واللحين كلا يمصمص في أياديه
أني قلت يمكن من السهاية تقول امي لا عادي الجهال كلهم جذي
وخدوده صار ليه فترة خشنين وساعات فيهم حبوب عطتني الدكتورة ليهم جل حق حساسية واستخدمته اسبوع ووقفت عنه صرت كل مابين فترة أحط ليه يعني مو على طول
خف شوي لكن ماراح للحين صار ليه فترة يعنو
آخر كلامش مافهمته عدل
تقصدي سعره فيه قشره؟
أني بعد يوم عمره سجود شهر يمكن صار ليه كم يوم اشوف في راسه قشره
والدكتور قال عادي
وخلاص صرت مااشوفها ولا استخدمت له شي
وشعره للحين يطيح كلا أشوف في مفرشه شعر
فيه حاجة تقهرني في سجود
اذا نعسان خاصة آخر الليل .. يفزع الدنيا ولا يرضى ينام حتى لو حاولت فيه انيمه يظل شويٍ زين قاتل روحه من الصياح ماينام على طول

ايه ماقلت ليكم بعد
علاعمري وياه فتاق ورحت به لجراح ويقول مايقدر يسوي ليه شي قبل مايكمل سنة
ويقول انه كبير واحتمال صغير ان يلتئم
والاسبوع اللي فات لما رحت وياه مراجعة قالت الدكتورة ان الحمدلله خف كأنه

تروحوا اي مستشفى انتون تتابعوا ويا ولادكم؟
أني أتابع في المواساة الدمام عند دكتورة فاتن ومرتاحة عليها بعد ماجربت كذا دكتور
والتطعيمات في التعليمي في الخبر
بعد اسبوعين تطعيمة سجود حقت الأربعة شهور

موضوع: رد: تجمع الأمهات ^_____^ 11/6/2011, 09:26

أهلين ماميات اخباركم ^_^ وحشتوني وايد تون مخلصين اختبارات يوم الثلاثا والحمد لله افتكيت وانهلكت واجد وا ن شاء الله النتيجه حلوة تطلع ..ام سيد سجاد مايشوف شر سيودي والله اني حمودي قلت لكم عن جسمة كان كله زي الحرار وبعدين راح وصار جاف مرة وكل ما ارطبه ليه دقيقتين ويرح البيبي اويل ولا يبين ولا اللوشن على طول يجف وبعدين كل مرة امي تقول وديه وديه المستشفى وام زوجي بعد واني اقول ليهم مافيه شي وداك الاسبوع امي وابوي حجزو ليه عند الدكتور باقر العوامي اللي سألتكم عنه مرة وقال لي انه هذ اكزيما وعطاني مرطب وشامبو وصابون كله خاص للجلد الحساس والاكزيما وقالي اهمتي فيه وان شاء الله سنه وتروح
وبس واشوفه اللحين خف واجد وجسمة صار انعم نورانيه كف حالش وكيف حال فاطمة ان شاء الله بخير .. وبس لا تقطعو خلونا نسمع اخباركم ..

موضوع: رد: تجمع الأمهات ^_____^ 18/6/2011, 10:06

كيف حالكم حبوبات وحشتوووووووووني مووووووت
مايشوفوا شر القمرين سيد سجاد ومحمد
أغلب الأطفال يعانون من الحساسية والإكزيما والقشرة
بنوتتي فاطمة مازالت الحساسية فيها والأدوية والمرطبات تريحها لكن الحساسية ترد ترجع مرحلة وتعدي ان شاء الله
والقشرة توني من اسبوع أشوفها عوما القشرة ماتضر الطفل تروح مع الوقت
لما صابت ولدي كنت أحط له زيت أطفال وأمشطه بشكل خفيف بمشط رفيع لين ماتروح نهائي
والحين بنوتتي قلت بخليها لين تكبر شوي اذا ماراحت القشرة بسوي لها نفس الطريقة
انا اللي مضايقني انها للحين تصيح من المغص وماتنام زين تشكي دايما من الغازات
وبديت أعطيها أكل وأحسن شي تحبه التفاح وحسيت التفاح يريحها من المغص يوم اللي أعطيها ترتاح لأن كثرة الحليب معروف تزيد المغص واللي أسويه طعمه تقريبا نفس اللي يبيعونه في الصيدلية لكن هذا طبيعي ومافيه مواد حافظة بقولكم الطريقة لأنه مرة لذيذ وراح يحبونه

أقشر تفاحة صغيرة من النوع السكري الى قطع صغار مرة واحطهم مع شوية ماي واغليهم على نار هادية مع شوية سكر نبات قطعة صغيرة بس بعد ماتستوي التفاحة
احطها في الخلاط مع ملعقة نشا الذرة ورشة خفيفة من الفانيلا وأرد مرة ثانيه أحطها على النار واحركها لين تستوي تصير مثل المهلبية ولونها وريحتها تجنن اتركها تبرد وبعدين أعطيها
ااعذروني ترى دايما مشغولة فطومة اخذت كل وقتي هذا غير شغل البيت
وبيتنا الجديد اللي قاعدين نبنيه حاملة همه مرة زوجي أخذ قرض ثاني على الفاضي العمال شغلهم بطيء
والشركة اللي تبني لنا مضغوطة وصار على راسنا نتابعهم وراهم وراهم ولافيه فايدة بس ندفع أقساط والشغل شبه متوقف
يالا اذا خلصنا وسكننا على خير بعزمكم بس لاتردوني وتتعذروا
يالا نشوفكم على خير .....
لاتقطعوا ... راااااااااجعة لكم قريب
ومبروك أم محمد على النجاح الله يساعدش امتحانات وتربية ونقل عفش وترتيب أحس حوووووووسة
الله يعطيش العافية يارب
أم سيد سجاد وش أخبار الكتكوت الصغير التئم لفتاق ؟؟ الله يعطيه الصحة والعافية ويبعد عنه كل شر ومرض يااااااارب

موضوع: رد: تجمع الأمهات ^_____^ 18/6/2011, 10:26

ايه صحيح وش أخباركم مع الملابس أنا رديت رحت السوق 3 أو أربع مرات أروح وأشتري لها ملابس
استهلكتهم بشكل كبير لأنها من النوع اللي يرجع بإستمرار مع اني ماقصرت في اللبس شريت لها وايد
هذا غير انها ماشاء الله تطول بسرعة لكن وزنها موذاك الزود ودي أشوفها دبة هههههههه أحب الدبيب احس أشكالهم كيوت
وللحين أحس رقبتها مو متزنة وراسها يروح يمين وشمال تصدقون للحين الفها وانومها مثل لصغار اللي توهم في اللفة

موضوع: رد: تجمع الأمهات ^_____^ 14/8/2011, 21:25

شحالكم أمهات؟

مرة كلنا انقطعنا مرة وحدة

متباركين بالمولد

أبغى منكم استشارة فيه أحد منكم موجود؟

موضوع: رد: تجمع الأمهات ^_____^ 2/11/2011, 19:23

وش حالكم أمورات

شكلكم كلكم غايبين المنتدى صار يجيب الكآبة

وحشتوني وحشتوني وحشتوني وهذي بوسه اممممممممممموح

أبشركم ولدت من زمان وجبت بنوته حلوة ملت علي حياتي

لكن صرت مشغولة حدي حتى الإنترنت ماأقدر أدخله

توظفت وعندي بنوتتي وطول اليوم مشغولة

مبروك ليكم كلكم على الولادة

مع السلامة ماأدري بتشوفو ردي او لا